السلام عليكم ورحمة الله وبركاته انا اتربيت في بيت فيه عنف وصوت عالي وضرب واهم حاجه التعليم واطلع الاولي ف المدرسه في سن المراهقة وجدت ابن خالتي ربنا يحفظه هين لين في معاملته مع اخته وامه ووالده كان حريص علي تعليمه القران وكان حسن الخلق وكان متفاهم كنت بحب اروح اقعد معاه واتكلم معاه وكان بيذاكرلي احيانا وهو اكبر مني بسنه واحده فاعترف بانه يريدني وكنا ف الاعدادي وتواعدنا علي ان نتمسك ببعض ونترك هذا الموضوع الي ان يأذن الله كان والدي دايما يحطني في منافسه مع ابن خالتي ده يقولي دا مبيفهمش حاجه دا خايب في المدرسه دا مخه تخين انتي هاتي مجموع وشرفينا وهكذا وابن خالتي ده جاب حاجه و٨٠ ودخل كلية حاسبات ومعلومات وبعديها بسنه انا جبت مجموع صيدله بفضل الله ...لما كنت بعدي عليهم البيت كنت بقوله ان مفيش فرق سن بينا عشان تقدر تشتغل وتخلص شقتك قالي لا تقلقي باذن الله ربنا هيكرمني...واجتهد في كورسات البرمجه وبدأ ف شقته وحده وحده وكنا بندعي ربنا حتى استعجبنا من هذا الرزق ووشطب الشقه الحمد الله واستقر مهندس برمجة خبرة في شركة ف القاهرة مع الشركه الخاصه به هو واصدقائه وهو في بداية شغله انا كنت في رابعه كليه تقدملي وبابا قال دا شقته مش باين عليها حاجه شغل ايه بتاع الكمبيوتر ده اي حد ياخد دورة كمبيوتر ويشتغل وانتي لسه قدامك سنه قلتله يا بابا انا موافقه مفيش فايده......لما اتخرجت انا هو اجتهد جدا وجمع مبلغ وكل حاجه بقت تمام واتقدم تاني بابا قال دا نسب ميشرفنيش وهو مش دكتور ولا مهندس ولا ظابط وشقته صغيرة ورافض رفض تام.. اتكلمت معاه مش عايز يسمعني خالص و محسسني اني مبفهمش حاجه وهو بس اللي بيفهم وقالي خالتك متتناسبش وان خالتي طمعانه فيا وهو طمعان فيا عشان الصيدليه قولت جوايا خلاص لما حد يتقدلي هرفض عشان يعرف اني مصممه.. وواتقدملي دكتور غني جدا ووالده ماشاء الله مدير مدرسه تقريبا قولتله انا مش هوافق ضربني وقالي متمرش تعليمي فيكي وغضبان عليكي. وانتي مفكرة نفسك هتلوي دراعي. والله لاسيبك تخدميني بدل ما تخدمي خالتك... وقالي انتي عملتي حاجه معاه ولا ايه💔. .. والد ابن خالتي كدب علي خالتي قبل كدا في كذا حاجه واتجوز عليها وسابها فترة ورجعلها دا اللي مخلي والدي لا ييتشرف بهذا النسب وخالتي مش في دماغها كليتي نهائي بتقول انا عايزه راحة ابني بس المهم بعد دا كله لجأت لعمامي وكانو واقفين معايا وقالو هنقنعه.. راح بابا سيطر عليهم وخلاهم ضدي روحت لاهل امي قالولي اللي باباكي بيعمله حرام لان الولد محترم و مستنيكي ومستعد يوافق باي شروط وقالولي والدك عنيد وذنبك في رقبته وقالولي احنا هنزوجك والدتي مريضه وبتخاف من بابا وليا ولدين خوات زي بابا.. اخويا قال لبابا قبل كدا نديله فرصه ونقعد نتكلم معاه!!بابا قال لا هي المفروض تقول اللي تشوفه يا بابا وانا لو قلت للولد يجيب كذا وكذا مش هيقدر.. قلتله انت مقعدتش معاه اصلا اطلب منه وشوف...قالي لا الكلام اللي بقوله تسمعيه.. وخليكي كدا والله ما هتشوفيه عشان ابقا عملت اللي عليا خليكي قاعدة ف البيت ومصمم فعلا انه مش هيزوجني.... دخلت واحد غريب من برا قالي باباكي صعب ومستحيل يوافق وقالي لو قعدت العمر كله حاولي توافقي علي اللي بيتقدم وخلاص وقاطع علاقتي بكل خالاتي ومش بيخليني امشي ف اي حته قريبه منهم وقالي البلد كلها بتسمع كلامي هتيجي انتي تكسري كلامي!!! انا هدوس عليكي...ولما حد يتقدم وارفض يقولي انا هخليكي تكرهيني واللي جاي هيبقا صعب عشان انا صبرت عليكي كتير .. و محسسني كل قرايبي طمعانين في صيدليتي وكذا حد لما جه يتكلم مع بابا قالولي انتي مشروع لوالدك وهو عايز حد غني يتجوزك ويفتحلك صيدليه عشان خواتك يشتغلو فيها. انا سألت هنا شيوخ ف البلد احسبهم علي خير قالولي ان ابن خالتي اللهم بارك علي خير كبير وان الدي عاضل تعبت جدا بقالي سنين في هذا الموضوع وبنبعد عن التواصل عشان حرام ونتعب ونرجع اوقات تانيه فتنه كبيرة ليا وساعات افكر اسيب البيت او اخلي قرايبي ييزوجوني انا عمري 25 سنه حاليا مش عارفه اصبر لحد امتا ولو صبرت هيوافق ولا لا... ولو قرايبي زوجوني هل هيئذيني او يؤذي ابن خالتي او اهله! وهو معندوش مشكله يستناني العمر كله وقالي انا عارف ان في احسن مني ومنك بس هرتاح معاكي مش عايز غيرك حتي لو في احسن